世俱盃H組第一輪，皇馬對住利雅得新月。1-1嘅比數，爆出世俱盃開賽以嚟嘅頭號冷門。對皇馬眾星嚟講，世俱盃首演都唔係咁如意。26歲嘅阿諾特令人失望，全場比賽失誤連連，遠遠都未入狀態。
6月1號，皇馬向利物浦支付一千萬歐元轉會費，提早一個月簽咗阿諾特，就係為咗世俱盃。對住新月呢場波，阿諾特毫無懸念咁正選上陣。喺硬石體育場六萬幾觀眾面前，阿諾特迎嚟皇馬首騷。
唔管係「特倫特」定係「阿諾特」，佢嘅優點缺點都好明顯：防守回追意識薄弱，企位感唔係咁好；反擊中有腳長傳能力，傳中腳法都幾精準。不過，阿諾特嘅皇馬首騷，冇展現出優勢，反而係失誤連連。
65分鐘出場時間，阿諾特兩次過人一次成功，12次甩甩漏漏失咗控球權，四次地面對抗得一次成功，社交平台上面，有球迷製作精華片段，指出阿諾特嘅問題所在：
阿諾特腳風唔順，右路嘗試傳中，可惜冇拉出高度，俾新月輕鬆解圍。
英國《泰晤士報》點評，阿諾特嘅皇馬首騷忙於防守，好少有機會展現自己嘅定位球腳法。面對多薩里、洛迪呢啲級數嘅邊路攻擊手，阿諾特嘅防守都有啲力不從心，五次對抗得一次成功。身價七千五百萬歐元嘅阿諾特，皇馬首騷就踢柴咗。
新月主帥小因扎吉嘅進攻思路，就係俾多薩里、洛迪聯手，衝擊阿諾特嘅右路，效果都唔錯──阿諾特防守能力唔係咁好，呢個係多年以嚟利物浦嘅問題，嚟到皇馬，阿隆索都要諗辦法揚長避短。
對於阿諾特嘅首騷，主帥阿隆索冇講細節，而係恭喜佢迎嚟皇馬第一場。阿隆索好清楚，阿諾特係一把雙刃劍，點樣使用佢，呢個係需要反覆打磨、研究嘅高難度任務。
